Իրականացված նախագծեր

Ձեռներեցություն և ֆինանսական գրագիտություն

Նպատակ

Մենք խթանում ենք Հայաստանում գրագետ ձեռնարկատիրական գործունեության ծավալումը՝ կայուն հիմք ստեղծելով երկրի տնտեսական զարգացման համար։

Դասընթացներ

• «Ֆինանսական գրագիտություն» – դասընթացն ուղղված է առօրյա կյանքում մարդուն անհրաժեշտ ֆինանսական կարողությունների, սեփական ֆինանսները կառավարելու հմտությունների, անվտանգ ֆինանսական վարքագծի զարգացմանը։
• «Ձեռներեցությունը և ես» – դասընթացի նպատակն է պատանիների շրջանում ձևավորել գործարար մտածելակերպ ու մոտեցումներ՝ խթանելով վերկուծական, պլանավորման, ռեսուրսների կառավարման, հաղորդակցման, որոշումների կայացման ու մի շարք այլ հմտությունների զարգացումը։
• «Ձեռներեցություն 0-ից» – դասընթացը բիզնես ոլորտի սկսնակներին ապահովում է բիզնես պլանի, մարքեթինգային ու ֆինանսական քաղաքականության մշակման համար անհրաժեշտ գիտելիքներով, զարգացնում գրագետ բիզնես գործունեություն վարելու համար անհրաժեշտ հմտություններ։

Ո՞ւմ համար է

• Աշակերտներ և պատանիներ
• Սկսնակ գործարարներ և բիզնես գործունեություն ծավալել ցանկացողներ

Արդյունքներ

• Մասնակիցներ՝ 430
• Դասընթացներ՝ 15

Կարի մեքենաներ՝ մարզերի դպրոցներին

Նպատակ

Նախագիծը մեկնարկել է  2021 թ-ին և շարունակվում է մինչ այսօր՝ նպատակ ունենալով կարուձևի մասնագիտական կարողությունների զարգացմամբ, հատկապես մարզերում, ապահովել ինքնազբաղվածության մակարդակի բարձրացում և հեռանկարային ներդրումներ կարի արտադրամասերի կամ ֆաբրիկաների հիմնման համար։

Նախագծի շրջանակում մարզերի դպրոցներին տրամադրվում են ուսումնական կիրառության համար նախատեսված կենցաղային կարի մեքենաներ, որոնք արժեն 70․000-ից 80․000 դրամ։ Նախագծով հետաքրքրվող կրթօջախները դիմում են մեզ, ծանոթանում պայմաններին և հերթագրվում՝ լրացնելով հետևյալ հայտը։ Ֆինանսավորումը տեղի է ունենում դրամահավաքների և/կամ նվիրատու կազմակերպությունների միջոցով։ Կրթօջախների հետ կնքվող նվիրատվության պայմանագրերով վերջիններս պարտավորվում են կարի մեքենան օգտագործել ոչ միայն տեխնոլոգիա դասընթացի շրջանակներում, այլև ունենալ կարուձևի արտադասարանային խմբակ։

Նախագածի շրջանակում «Բարձունք»-ի տնտեսագետները դպրոցներում ձևավորված թիմերի հետ իրականացնում են նաև ձեռներեցության դասընթացներ։ Նպատակն է նրանց տալ ձեռներեցությամբ զբաղվելու առաջնային հմտություններ։

Ո՞ւմ համար է

• դպրոցների աշակերտներ,
• կրթամշակութային կենտրոնների սաներ։

Արդյունքներ

• Դպրոցներ՝ 47
• Աշակերտներ՝ 530
• Խմբակներ՝ 33
• Ներգրավված գումար՝ 4,230,000 դրամ

ՏՏ ոլորտի մասնագիտական կողմնորոշում դպրոցականներին

Նպատակ

ՏՏ ոլորտն այսօր աշխատաշուկայի ամենագրավիչ ու բազմաճյուղ ուղղություններից է։ Աշակերտները հաճախ դժվարանում են պատկերացնել, թե մասնագիտական ինչ հնարավորություն է առաջարկում այս ոլորտը։ Նախագիծն օգնում է աշակերտներին․

• կողմնորոշվել ՏՏ ոլորտի մասնագիտություններում,
• հասկանալ թե յուրաքանչյուր մասնագիտությունը ի՞նչ աշխատանք է ենթադրում,
• կողմնորոշվել հետագա կրթության հարցում։

Ո՞ւմ համար է

Նախագծին մասնակցել կարող են՝

• 8-12-րդ դասարանի աշակերտներ, 
• Երևանից դուրս գտնվող գյուղական համայնքների փոքր դպրոցներ, որոնք չունեն մեծ ֆինանսավորում։

Արդյունքներ

• Դպրոցներ՝ 11
• Աշակերտներ՝ 293
• Խոսնակներ՝ 7
• Ներգրավված գումար՝ 240,000 դրամ

Արևային թատրոն

Նպատակ

Մանուկները մշտապես մեր ուշադրության կենտրոնում են։  «Արևային թատրոն»-ը ինտերակտիվ, ուսուցողական ներկայացումների շարք է, որոնց շնորհիվ փոքրիկ հանդիսատեսին է փոխանցվում ազգային և համամարդկային արժեքներ, համագործակցային ստեղծագործական հմտություններ։ Նախաձեռնությունն իրականացվել է 2021թ․։

Ո՞ւմ համար է

Ներկայացումները նախատեսված են նախադպրոցական տարիքի երեխաների համար՝ Հայաստանից, Արցախից և Սփյուռքից։

Արդյունքներ

• Ներկայացումներ՝ 15
• Մասնակիցներ՝ 100+

Մեր ներկայացումները

Ճանապարհորդություն գրքի հետ

Ինտերակտիվ ներկայացումը պատմում է մի փոքրիկ թրթուրի մասին, ով բացահայտում է ինքն իրեն և իրեն շրջապատող աշխարհը մի հետաքրքիր գրքի միջոցով։ Ներկայացման հիմնական նպատակն է ցույց տալ հրաշքներին հավատալու կարևորությունը, սեր արթնացնել գրքերի և նոր գիտելիքներ ձեռք բերելու նկատմամբ։

«Ծովային ճանապարհորդություն»

Ներկայացումը պատմում է ծովային կենդանիների կախարդական ընկերության մասին և ուղղված է փոքրիկ հանդիսատեսի շրջանում համատեղ գործելու, միասին խաղալու կարևորության և առավելությունների գաղտնիքը բացաահայտելուն։

«Խնձո՞ր, թե՞ կոնֆետ»

Ինտերակտիվ ներկայացման մեջ հիմնական շեշտադրումները վերաբերվում են առողջ ապրելակերպին և առողջ սնվելուն։ Ներկայացման հերոսները հետաքրքիր փորձառության են ենթարկվում, երբ տրվում են քաղցր կոնֆետի գայթակղությանը։ Ներկայացումը սովորեցնում է վարել առողջ ապրելակերպ և սնվել միայն առողջ սննդով։

«Գարնան յոթ գույները»

Այս ներկայացումը ուսուցողական է և անդրադառնում է ընտանի կենդանիների, գարնան և գույների թեմատիկային։ Ներկայացման հիմնական նպատակը ստեղծագործական և խնդիրներ լուծելու հմտությունների զարգացումն է։ Ներկայացումը սովորեցնում է ընկերասիրություն, փոխօգնություն և հոգատարություն։

«Ամանորին ընդառաջ»

Ինտերակտիվ ներկայացումը շոշափում է բնապահպանական հարցեր և խրախուսում է Ամանորին եղևնի չկտրել, այլ հետևել ավանդույթներին և պատրաստել կենաց ծառ։

Մենթորության ծրագիր` ՏՏ ոլորտի սկսնակների համար

Նպատակ

ՏՏ ոլորտն այսօր մեծ գրավչություն ունի, սակայն այս ոլորտում կողմնորոշվելը շատերի համար բարդություններ է առաջացնում։ Նախագծի նպատակն է օգնել մենթիին․

• կողմնորոշվել ՏՏ ոլորտում,
• ուղղորդել անհրաժեշտ դասընթացների,
• լինել խորհրդատու` ՏՏ ոլորտի հարցերի վերաբերյալ։

Ո՞ւմ համար է

Նախագծին մասնակցել կարող են՝

• առաջնահերթ՝ պատերազմին մասնակից երիտասարդները, 
• ՏՏ ոլորտով հետաքրքրվող երիտասարդները։

Արդյունքներ

• Մասնակիցներ՝ 9

• Մենթորներ՝ 8
• Մասնակիցների աշխատանքային հաջողություններ՝ 50%

Գաղափար-Ներդրում-Բիզնես

Նպատակ

Համայնքների ջ տնտեսության զարգացումը մշտապես մեր ուշադրության առանցքում է։ Այս նախագծի շրջանակում մեր նպատակն է․

• Հայաստանում ներդրումային և գործարար միջավայրի զարգացման խթանումը,
• Հատկապես մարզերում նոր բիզնեսների հիմնումն ու զարգացումը, արդյունքում՝ հայաստանյան տնտեսության առաջընթացը, աշխատատեղերի ավելացումն ու բազում սոցիալական խնդիրների լուծումը,
• Սփյուռքի, ինչպես նաև հայաստանաբնակ մեր հայրենակիցների հետ վստահության և համագործակցության նոր ձևաչափի ստեղծումը։

Այս ծրագիրը բաղկացած է երկու հիմնական նախագծերից՝  «Դարձի՛ր ներդրող» և «Ներկայացրո՛ւ նախագիծ», որոնք միմյանց են կապում բիզնես գաղափար ունեցող և ներդրում կատարել ցանկացող մեր հայրենակիցներին, ովքեր համատեղ ջանքերով իրականություն են դարձնում տարաբնույթ բիզնես նախագծեր՝ նպաստելով Հայաստանում համայնքների և գործարար ոլորտի զարգացմանն ու տնտեսության առաջընթացին։

Ծրագրի մասնակիցները կարող են բիզնես գործունեություն ծավալել ամենատարբեր ոլորտներում՝ կրթությունից մինչև բարձր տեխնոլոգիաներ, զբոսաշրջությունից մինչև գյուղատնեսություն, առողջապահություն, արտադրություն ու մշակույթ։

Ո՞ւմ համար է

• սկսնակ և գործող բիզնեսներ,
• բիզնես գաղափար ունեցողներ,
• ներդրողներ։

Արդյունքներ

Ծրագրի շնորհիվ՝ արդեն իսկ իրականություն է Կողբում հիմնված և շահագործվող գինու գործարանը, որը 2021 թ․-ին մթերել է շուրջ 80 տ խաղող։

Թվային ճանապարհ

Նպատակ

Մրցունակ, որակյալ կրթությունը առաջնահերթութ է բոլոր ժամանակներում։ «Թվային ճանապարհ»-ը հնարավորությունների մասին է։ Նախագծի նպատակն է հայրենիքի պաշտպաններին․

Ո՞ւմ համար է

• սովորեցնել նոր մասնագիտություն,
• ծանոթաացնել  նորագույն տեխնոլոգիաներին,
• տալ ՏՏ ոլորտ մուտք գործելու համար բազային գիտելիքներ,
• ծանոթացնել freelance հարթակների հետ։

Ո՞ւմ համար է

Նախագծին մասնակցել կարող են՝

• 4-օրյա և 44-օրյա պատերազմների մասնակիցները,
• 4-օրյա և 44-օրյա պատերազմների մասնակիցների ընտանիքի անդամներ։

Դասավանդվող մասնագիտություններ

• Վեբ ծրագրավորում՝ 4 ամիս
• Նախագծերի կառավարում՝ 2 ամիս

Արդյունքներ

• Մասնակիցներ՝ 8
• Դասախոսներ՝ 3

100 ընկեր՝ զինվորին

Նպատակ

Նախագիծն իրականացվել է 2021-2022թթ։ Նախագծի նպատակն էր աջակցել հայրենիքի պաշտպան մեր զինվորներին, ովքեր վիրավորում են ստացել մարտական գործողությունների ընթացքում։ 

Յուրաքանչյուր ամիս նախագծային թիմը ներգրավում էր 100 ընկեր, հարյուր կամեցող հայրենակից, ովքեր 5000-ական դրամ էին տրամադրում նախագծի ֆոնդին։ Արդյունքում, վիրավորում ունեցող 5 զինվորի ամսեկան 100,000 ՀՀ դրամ աջակցություն էր տրամադրվում։ Ծրագիրը սկսվել է 2021թ.-ի ապրիլ ամսից։

Ո՞ւմ համար է

Նախագիծն ուղղված էր՝

• վիրավորում ունեցող զինվորներին,
• զոհված զինվորների ընտանիքներին։

Արդյունքներ

• Զինվորներ՝ 42
• Աջակիցներ՝ 315
• Ներգրավված ֆինանսներ՝ 4,655,000 ՀՀ դրամ

Գյուղատնտեսական աջակցություն

Նպատակ

Նախագիծն իրականացվել է 2021-2022թթ։ Նպատակն էր աջակցել գյուղական համայնքներում ապաստանած տեղահանված արցախցիներին՝ նպաստելով գյուղտնտեսությանը։ Նախագծի շրջանակում «Աջակցություն արցախցուն» նախաձեռնության հետ համագործակցությամբ յուրաքանչյուր ամիս ֆինանսական աջակցություն է զուցաբերվել տեղահանված բնակչության տնտեսության զարգացմանը։ Ֆինանսական միջոցները ներգրավվել են ամենամսյա դրամահավաքներով։

Ո՞ւմ համար է

• Նախագծին շահառուներն են՝
• ՀՀ գյուղերում բնակվող Արցախից տեղահանված ընտանիքները
• Պատերազմի մասնակիցներ

Արդյունքներ

2022

• Ընտանիք՝ 1

Լուսակետ սահմանին

Նպատակ

Նախագիծը սոցիալ-տնտեսական նշանակության տարբեր ծրագրերի միջոցով նպաստում է սահմանամերձ բնակավայրերում բնակչության զբաղվածությանը, կենսամակարդակի աճին՝ կանխելով արտագաղթը տվյալ համայնքներից։

Այս նախագծի շրջանակում «Բարձունք»-ը համագործակցում է «Դեպի համայնք» համայնքային զարգացման հասարակական կազմակերպության և Բեռլինում բնակվող հայերի կողմից ստեղծված «Լուսակետ» միության հետ։

Ո՞ւմ համար է

Առաջին փուլում նախագծի թիրախում Սյունիքի մարզի Գորիս համայնքի Ներքին Խնձորեսկ գյուղն է:

Թռչնաբուծարան

2021թ. հունիսին մեկնարկեց Ներքին Խնձորեսկում թռչնաբուծական փոքր տնտեսության ծրագիրը: Վերջինիս շրջանակներում շահառու ընտանիքը սեփական հողամասում կառուցեց թռչնաբուծարան և ստացավ 100 հավ: Եվս հարյուրը ձեռք բերեց սեփական ներդրմամբ: Թռչնաբուծարանը սկսել է գործել 2021թ. նոյեմբերից: Պայմանագրի համաձայն` շահառուն պարտավորվել է.

• Ներքին Խնձորեսկ գյուղի բնակիչներին շուկայականից էժան գնով ապահովել հավկիթներով, 
• թռչնաբուծարանը զարգացնելու դեպքում գյուղի յուրաքանչյուր ընտանիքի անվճար ապահովել հավի 10-ական ճտերով,
• անհրաժեշտության դեպքում գյուղի բնակիչներին անվճար խորհրդատվություն տրամադրել թռչնաբուծության ոլորտի վերաբերյալ:

Ցայտաղբյուր

Ներքին Խնձորեսկի պուրակում 2021թ․ մեծ ծառատունկ է իրականացվել, սակայն ծառերը ջրելու հարցը բավական դժվար էր: Գյուղացիներն այն իրականացնում էին դույլով ջուր կրելով:

Ցայտաղբյուրի կառուցումը հնարավորություն կտա հեշտացնել պուրակի ոռոգման հարցը:

Արդյունքներ

Նվիրատվություն՝ 1,260,000

Համաֆինանսավորում՝ 600,000

Հավ՝ 200

Ձու /Օրական/՝ 100