Մեր տարբերանշանի հիմքում դեպի կենտրոն ձգվող ճառագայթների տրամաբանությունն է, որը խորհրդանշում է մեկ գաղափարի  շուրջ կենտրոնանալը․ բոլոր գծերը ձգվում են դեպի մեկ կետ, մեկ նպատակ։ Այն մեր երազանքի ու նպատակի խորհրդանիշ է, ամեն մի ճառագայթ մի գործ է, և այդ գործերը միասին, ի վերջո,  տանում են դեպի մեծ նպատակի իրականացում։

Տարբերանշանի մանուշակագույն  գույնը հոգևոր աճի, միշտ դեպի լույս ընթանալու մեր խոստման խորհրդանիշն է, մուգ կապույտն արտացոլում է մեր հաստատակամությունը, համակարգային մոտեցումներն ու ընտրած ճանապարհը՝ կրթությունը։

Գունդ (Գովընդ) – Վերվերին մեր համայնքային պարն է։ Այն հայության հավաքական ուժի և դեպի լույս ձգտող միասնական կամքի խորհրդանիշն է, որում տարբեր անհատականությամբ մարդիկ ներդաշնակվում են միմյանց և բնության հետ՝ հանուն համընդհանուր բարիքի ստեղծման։

Գունդ-Վերվերիի մաս կազմող յուրաքանչյուր ոք առաջնորդվում է «լավ է բոլորի համար` լավ է նաև ինձ համար» սկզբունքով՝ գործելով հօգուտ բոլորի,  ընթանալով միշտ առաջ։

Գնդի ժամանակ կուտակված ողջ էներգիան Վերվերիի միջոցով ուղղվում է դեպի լույս՝ դառնալով կամք ու գործ։